عدنان فرج الساعدي
عمي أنتم الشباب الزغار .. شوية على كيفكم ويانا 
تره أنتم جنتم ما مكملين لقاحات لما سقط الطاغية وأهلكم الضيم والقهر كاتلهم
تره قبل بايام البعثية الملعونين
كان راتب الموظف ميجيب طبقة بيض
أما سالفة اللحم فسالفة 
وينه اللي يگدر يشتري نص كيلو لحم حتى يسيوه عشر وجبات
والسمج غالي بحيث راتب المتقاعد بيه سمجتين فقط
والدجاج يضرب بيه المثل … ناس تاكل دجاج وناس تتلكه العجاج وجماعة العجاج أنتم وأهلكم عزيزي .
لذلك انتشرت عرباين الفشافيش في الشوارع
رع واللي يدخنون كانوا يشترون جكاير مفرد يدخن وحده ويخلي الباقي باذاناته ياعيوني
عزيزي لا تسال على الجكليت والبيبسي والموز 
والموطا ..
اسالوا جماعة الاورفلي شلون جانوا يبيعون الطحين المصنوع من الخبز اليابس والذرة ونوى التمر والنخالة …

أسأل الوالدة جم مرة صبغت عبايته واخوك الجبير كم مرة يودي حذاءه اجلكم الله الى الاسكافي .. 
اللي من تروحله تلزم سره وينطيك موعد يومين ثلاثة اسبوع علمود يخيط ( القندرة )

زين اذا عطلت ثلاجتكم تقوم القيامة لازم تودي الماطور للتجفيفت والماطور الزين مجفت اقل شي مرتين أو ثلاثه
والمبردة نكص القاعدة الخايسة ونلحمه فوك ونخلي القاعدة الفوك جوه 
وتشوف الناس هذا الشايل واتربم وهذا الشايل الماطور وهذا يدور قايش 
ودايخه وملابسها رثة ..
اما المجمدة فكل عشر بيوت بيت واحد عدهم مجمدة ؟؟

وجنا نرش السطح علمود ننام على بيه تدرون ليش 
لانه اذا انطفت الكهرباء بحزيران وتموز وأب ماكو مولدة وخط ذهبي

واذا ضجت من القناة الاولى لان الريس يحجي ويه الضباط من الساعة ثمانية مساءا الى ال ١٢ مساءا
دوره على القناة الثانية وتلكاها هم مطلعها الريس ؟؟

طبعا اعزائي ماكو لا موبايل لانه يعتبر تجسس على الوطن ولا انترنيت الا في مكاتب الدولة وبعض المكاتب المجازة
اما الدش فهو جريمة يعاقب عليها القانون .. ها عمو 
انتظروا الجزء الثاني قريباً جداً

اترك تعليق

Please enter your comment!
Please enter your name here