ماذا وجد في دفتر ملاحظات شهيد

0
129

 ملاحظات : —

 

1..تناوبنا انا وصديقي محمود على ارتداء قمصلة واحدة في الواجب لأننا لا نملك سواها ولازالت(اسنوني اطكطك من البرد ).

 

2..إلى هذه اللحظة أهالي الموصل أكثرهم مع داعش ولم يتعانوا معنا مثلما تعاون معنا أهالي الفلوجة..

 

3..صديقي محمد الأسبوع القادم زواجه وهو شهيد في مطار تلعفر الان وصديقي سيد حسن الحنه مالته بعد غد وهو جريح بترت يده اليمنى..

 

4..طعامنا اليوم بتيتا نص سلك لأن ما عدنه حطب وخبز يابس وبقايا بصل أخضر وتمر يابس نصه معفن..

 

5..اتصلت بي امي وقالت لي أن ابنتي زينب مصابة بالنكاف عمت عيني..وابوي ضغطه صاعد لأن متعارك وي خالي جاسم..

 

 

6..زوجتي زعلانة لأن كلما اواعدها نروح لأهلها يطلعلي واجب والتحق وآخر مرة كنت ما مستلم راتب وفلوس الروحة لأهلها ضميتهن حتى التحق بيهن.

 

 

7..السلفة ام ال500الف ما طلعتلي وعبالي أصلح السكف قبل المطرة وبلكي الله و يسترنا لما استلم السلفة.

 

8…آخر مرة قبل لا التحق ضحك عليه ابو حميد ابو الأسواق وكالي خايب انت عايف اهلك وفروخك ورايح تقاتل وجاي اتدور يمي البسكت الرخيص والجبن ابو 2 ب750 والقادة تأكل مسلفن وحسرة عليك الكروة من أمدااااك..الصراحة كلام ابو حميد جرحني..بس ترة مو كل القادة هيج ولا كل الجنود ما عدهم وبعدين اني ما رايح العب.

 

 

9…ذاك اليوم اجانا ابو مهدي المهندس ولابس كلاو اسود والحمزة ردت اطلبه منه لان اذاني يابسات من البرد بس انوب سكتني صديقي فيصل كالي خايب كله على رويتب زين على قطعة لاخوك الشهيد..جاي تطلب كلاو..مال الغسل اي والله مال الغسل..

 

 

10..خابرني صديقي ليفر وهو مسيحي وكالي خويه مسويلك دولمة وخبز بلحم بس مال عيسى مو مال العباس شوكت ما ترجع تأخذه لجماعتك.

 

11..سلمان ابن حجي فضالة اكل كلبي متعارك وي صديقته اللي يحبها لأن كايلتله جاي تسمع(( عباس عينك عالحشد بجاه العقيلة ارعاهم )) وتذكره..فسلمان كايللها..ولج العباس عمت عيني وكلبي مفكوسه عينه واحنه فوك ضيمه بمكان ما ندافع عن اخوه واخته تكليله عينك على الحشد هو بياحال.

 

12..والحمزة ابو حزامين أتحلمت مستشهد وزنوبه اتجر بالتابوت وامي صافنة عليها وابوي وخالي لأول مرة واكفين ومايتعاركون بيناتهم

المشاركة

اترك تعليق